Alares, por terceiro ano consecutivo, na súa aposta por contribuír á integración definitiva das Persoas con Discapacidade, quere sensibilizar a sociedade coa iniciativa “Reparte flores", que nos anos anteriores colleitou un gran éxito. Máis de 30.000 persoas sumáronse a esta campaña, co fin de mostrar o seu compromiso coa discapacidade. Mantén o seu obxectivo inicial: concienciar para alcanzar a normalización, porque só así se conseguirá a inclusión laboral e social baseada na igualdade de oportunidades.
É vital apostar polo talento destas persoas, que contan con formacións adecuadas, gran implicación e motivación, e teñen a capacidade de facer o seu traballo baixo os máximos estándares de calidade, aumentando a produtividade de calquera empresa.
Nesta liña, ao longo de 2015 e respecto ao ano anterior, aumentou o número de contratacións nun 27 %, con previsións de superar o 30 % antes de finalizar o ano. A Metodoloxía Alares aplicada á Xestión de Persoas, xestionada por Alares Social Centro Especial de Emprego (CEE) e Fundación Alares, é a base na que se fundamenta este crecemento, que ten como característica principal o desenvolvemento profesional e a satisfacción das persoas que traballan na dita entidade, así como o alto nivel de calidade que perciben os seus clientes.
En concreto, Fundación Alares realiza durante todo o ano numerosas xornadas de formación para empresas, programas de sensibilización social e empresarial, así como formacións específicas, que pretenden facilitar o acceso ao mercado laboral destas persoas. O ano pasado, formáronse case 400 persoas, que adquiriron as aptitudes e habilidades necesarias para acceder máis facilmente e en mellores condicións ao mercado laboral. Por todo iso, aproveitando un ano máis o Día Internacional da Discapacidade, que se celebra o vindeiro 3 de decembro, Alares quere chegar novamente ao maior número de persoas coa iniciativa “Reparte flores”.
A idea, un ano máis, é compartir, entre todos, a través das redes sociais, do correo electrónico e/ou de WhatsApp, unha flor que integra as distintas discapacidades e que pretende dar visibilidade non só neste día, senón sempre, á Discapacidade como parte integrante e enriquecedora da nosa sociedade. Tamén se creou o hashtag #FlorPorLaDiscapacidad.
