A Delegación Gobernamental mostrou un grande interese polos programas de integración laboral postos en marcha pola Fundación Alares
Fundación Alares recibiu onte na súa sede madrileña a Federación de Persoas con Discapacidade de Pequín. O seu vicepresidente, Mr. Ma Dajun, acudiu acompañado por un equipo de profesionais co obxectivo de coñecer a Fundación Alares® e as súas liñas de actuación en relación coa discapacidade. Así mesmo, a Delegación mostrou interese por coñecer a situación actual do sistema español en relación coa asistencia ás persoas en situación de dependencia e os seus procesos de integración social.
Durante o encontro, a Delegación mostrouse moi atenta ás accións levadas a cabo en relación coa integración das persoas con discapacidade no mercado laboral, así como ao asesoramento que se presta ás empresas para o correcto cumprimento da LISMI (Lei de Integración Social das Persoas con Discapacidade).
Neste sentido, suscitou especial interese o teletraballo, unha opción para a integración laboral deste colectivo, así como as investigacións que a Fundación publicou para fomentar a sensibilización da cidadanía arredor deste tema.
Federación de Persoas con Discapacidade en China
Entre os obxectivos da Federación de Persoas con Discapacidade en China están a representación dos intereses das persoas con discapacidade e a protección dos seus dereitos. Ademais, a Federación é responsable de ofrecer servizos de rehabilitación, formación, integración laboral… adecuados e deseñados para satisfacer as necesidades de cada persoa. O persoal da Federación colabora moi estreitamente coa Asociación de Voluntarios da cidade, levando a cabo todo tipo de iniciativas de utilidade para este colectivo.
A Federación de Persoas con Discapacidade de China, organismo estatal, foi fundada en 1988 e atende 83 millóns de persoas con discapacidade. Conta con federacións en cada provincia ou cidade, como é o caso de Pequín, coa Federación de Persoas con Discapacidade de Pequín, que atende máis dun millón de persoas.
Este primeiro achegamento entre ambas as institucións supuxo un enriquecedor intercambio de experiencias e constitúe o comezo dunha relación que pretende ser frutífera a medio e longo prazo. Un dos primeiros acordos alcanzados é o seu interese en participar e achegar as súas experiencias no II Congreso Internacional que a Fundación Alares® realizará en marzo de 2010 en Madrid. Igualmente, a Fundación Alares® foi convidada a Pequín para coñecer de primeira man os traballos que realizan en materia de inserción laboral das persoas con discapacidade.
