A Fundación Alares®, en colaboración coa CNSE (Confederación Nacional de Persoas Xordas Españolas) e Lo Que No Existe, presenta o libro SORDO e que! A vida de persoas xordas que acadaron o éxito.

A Fundación Alares® en colaboración coa CNSE (Confederación Nacional de Persoas Xordas Españolas) e coa editorial Lo Que No Existe promove un libro autobiográfico sobre a vida de trece persoas xordas que acadaron o éxito na súa carreira profesional: Sordo, e que? Vida de persoas xordas que acadaron o éxito. Dª Mª Teresa Fernández de la Vega, vicepresidenta primeira do Goberno de España, redactou a presentación do libro e D. Javier Benavente Barrón, presidente da Fundación Alares®, realizou o prólogo. D. Álvaro Marchesi, catedrático de Psicoloxía Evolutiva e da Educación na UCM, encargouse da introdución, e o epílogo escribiuno D. Luis J. Cañón. Con esta iniciativa social, a Fundación Alares® deu a coñecer este libro, que se presentou o pasado martes, 27 de novembro, na Sala Cambio Cultural de El Corte Inglés de Serrano, 52, Madrid. Os dereitos de autor e os posibles beneficios derivados da súa venda destinaranse á Fundación CNSE, co fin de que esta entidade poida desenvolver proxectos sociais, educativos, culturais e deportivos que axuden a mellorar a inserción social das persoas xordas. A súa distribución a nivel nacional chega aos principais puntos de venda do país, como El Corte Inglés, Fnac, VIPS, etc. As propias experiencias relatadas polos trece autores pretenden dar a coñecer á sociedade en xeral o valor e o sacrificio que este grupo de persoas demostra no día a día, manifestando a través das súas vivencias o éxito persoal e profesional acadado por cada unha delas. Estes testemuños converten o silencio en son e o murmurio en berro. A obra inclúe o texto íntegro da lei pola que se recoñece a lingua de signos, se regula o dereito á súa aprendizaxe, coñecemento e uso, e se establecen e garanten os medios de apoio á comunicación oral das persoas xordas, con discapacidade auditiva e xordocegas. A Lei da Lingua de Signos e dos Medios de Apoio á Comunicación Oral das Persoas Xordas, con Discapacidade Auditiva e Xordocegas foi aprobada o pasado 10 de outubro de 2007. Coñecida popularmente como Lei da Lingua de Signos, foi aprobada por unanimidade polo Pleno do Senado de España e constitúe unha reivindicación histórica do movemento asociativo representativo das persoas xordas, con discapacidade auditiva e xordocegas. «Libros coma este constitúen un estímulo e unha inspiración para quen, desde as nosas responsabilidades políticas, estamos comprometidos coa construción dunha sociedade máis xusta e igualitaria. O Goberno de España comprometeuse a garantir o acceso pleno das persoas xordas á vida política, económica, cultural e social», afirma na presentación Dª Mª Teresa Fernández de la Vega, vicepresidenta primeira do Goberno de España. D. Javier Benavente Barrón, presidente da Fundación Alares®, salienta no prólogo que «a razón e a causa deste libro encaixan perfectamente cos principios da Fundación Alares®. Por este motivo decidimos apoialo e facelo realidade». D. Álvaro Marchesi, secretario xeral da Organización de Estados Iberoamericanos para a Educación, a Ciencia e a Cultura e catedrático de Psicoloxía Evolutiva e da Educación na Facultade de Psicoloxía da UCM, afirma na introdución que «o libro que agora teño o gusto de introducir presenta a vida dalgunhas persoas xordas nas que a entereza e a determinación se asocian coa capacidade de tolerar a frustración e co desexo de vivir unha vida plena». D. Luis J. Cañón, presidente da Confederación Estatal de Persoas Xordas (CNSE), entidade nacida en 1936 que defende os intereses das persoas xordas e das súas familias, declara no epílogo que «o libro recolle o testemuño de moitas persoas xordas que, grazas ao seu espírito de superación, destacaron en distintos ámbitos da vida. Historias de cidadáns e cidadás de primeira que, en definitiva, deben coñecerse. Historias para lembrar». Este libro serve para coñecer dunha maneira moi especial un colectivo que representa case dous millóns de persoas en España. Aínda que moitas persoas afectadas pola xordeira quedaron fóra por cuestións de espazo e tempo, os protagonistas constitúen un reflexo fiel dos sentimentos, esperanzas, queixas, ilusións e coraxe desa maioría silenciosa. Os autores asinan co seu propio nome e apelidos. Non son pseudónimos, senón verdades contundentes.