A Fundación Alares® pon en marcha o maior Congreso sobre calidade de vida e competitividade

Verónica Sánchez
Igualdade, conciliación persoal e laboral, dependencia e diversidade; e a influencia estratéxica destes conceptos na competitividade empresarial, serán obxecto de debate, dentro duns meses, por primeira vez en España, no Congreso que a Fundación Alares® planea celebrar os próximos 20 e 21 de febreiro no Recinto Ferial IFEMA de Madrid. Será o primeiro dos foros anuais de encontro internacional promovidos por esta Fundación para o intercambio de experiencias sobre os asuntos de actualidade máis sensibles nas sociedades desenvolvidas. O Congreso vai dirixido tanto aos primeiros executivos das empresas como aos responsables de institucións públicas e profesionais que poidan ter algunha relación cos temas desenvolvidos. De feito, está concibido como unha vía para transmitir coñecementos teóricos e experiencias prácticas e, ao mesmo tempo, entrar en contacto con profesionais doutros países con intereses comúns. O Congreso ten capacidade para 1.200 asistentes. Ademais de España, participarán os Estados Unidos, o Canadá, Francia, o Reino Unido, Dinamarca, Alemaña, a República Checa e Irlanda, entre outros. A temática do Congreso abrangue os aspectos máis importantes que conforman os novos conceptos da vida colectiva que están a transformar a sociedade nos inicios deste novo século XXI, facendo especial referencia ao seu impacto na produtividade e na competitividade das empresas. Coa asistencia de máis de 20 países e a participación dos mellores relatores e conferenciantes, tanto nacionais como internacionais, abordaranse as últimas tendencias teóricas, as experiencias prácticas e os resultados obtidos en distintos países nos temas obxecto do congreso. É un punto de encontro e referencia para a sociedade empresarial, civil e institucional. O formato no que se abordarán os contidos deste I Congreso Internacional “Calidade de Vida e Competitividade Empresarial” combinará máis de 40 relatorios eminentemente prácticos, programados nos distintos ámbitos que aborda, e estará composto por: sesións plenarias. Conferencias paralelas. Experiencias de empresas, países e institucións. Mesas de traballo. Perfil dos asistentes:
  • As principais empresas establecidas en España, representadas polos seus accionistas, executivos, directivos e profesionais, así como outras non establecidas en España pero con intereses na temática do congreso.
  • Institucións públicas e privadas de ámbito local, autonómico, nacional e internacional.
  • Embaixadas estranxeiras no noso país.
  • Universidades e escolas de negocios españolas e doutros países.
  • Asociacións, organizacións empresariais, sindicais e fundacións, tanto españolas como doutros países.
  • Persoas, profesionais independentes e investigadores implicados ou sensibles ao tema do Congreso.
  • Medios de comunicación.
Perfil dos postos:
  • As principais empresas prestadoras de servizos ás persoas e ao sector privado en xeral
  • Provedores de produtos e servizos para as administracións públicas e empresas privadas
  • Institucións públicas de ámbito local, autonómico, nacional ou internacional
  • Institucións financeiras e compañías de seguros
  • Consultoras
  • Empresas editoras
  • Empresas inmobiliarias con intereses nos temas do congreso
  • ONG e fundacións
  • Centros de investigación, universidades e escolas de negocios
  • Etc.
Materias de investigación e debateOs relatores, expertos españois e dos distintos lugares do mundo, trasladaranos as súas investigacións, políticas, experiencias prácticas e resultados obtidos, de tal forma que os asistentes, procedentes igualmente de diferentes países, rematen cunha visión global, clara e actual sobre os temas tratados. O novo posicionamento estratéxico:Expertos en posicionamento estratéxico, gurús internacionais, exporán como inflúen os principais conceptos obxecto de estudo e debate neste congreso (igualdade, conciliación traballo-familia, dependencia e diversidade) na competitividade social e económica das empresas e dos países. As sociedades avanzadas son cada vez máis sensibles ás cuestións sociais e de calidade de vida. Só aquelas organizacións capaces de responder a estas novas demandas terán posibilidades de desenvolverse e acadar o liderado neste novo contorno social. Conciliación e competitividade: políticas, experiencias e resultados Non se trata dunha moda pasaxeira. As políticas de conciliación representan unha oportunidade para avanzar no benestar dos traballadores e mellorar a competitividade das empresas. O seu éxito require a implicación e a responsabilidade de todas as partes involucradas na relación laboral. Este congreso pretende ser o espazo onde os membros da alta dirección das organizacións, os traballadores, os axentes sociais e a Administración Pública analicen e expoñan as súas reflexións e experiencias co obxectivo de dar un maior impulso ás medidas de conciliación traballo/vida persoal e mellorar así a competitividade das empresas e do país. Diversidade, fonte de innovación e coñecemento A diversidade sempre estivo presente na sociedade. Porén, algunhas empresas non son plenamente conscientes dos beneficios de contar con grupos de profesionais heteroxéneos. Por suposto, non todo remata no momento da contratación, senón que, para asegurar o éxito, é preciso xestionar a diversidade de forma eficaz. As organizacións líderes que xestionan axeitadamente a diversidade son máis innovadoras, sustentables e rendibles, xa que permiten e fomentan o desenvolvemento das potencialidades dos seus profesionais. Neste congreso analizarase a diversidade como unha vantaxe competitiva para as empresas a través das experiencias neste ámbito, así como dos retos futuros que se presentan a nivel social. Igualdade de oportunidades, deber social e fonte de vantaxes A igualdade de oportunidades constitúe un dereito básico de toda persoa, calquera que sexan a súa condición, raza, sexo, situación e o contorno no que desenvolva a súa actividade. Ademais, impulsa o dinamismo das sociedades porque optimiza os recursos, creando máis valor e riqueza tanto para a empresa como para a sociedade. Neste congreso analizarase a igualdade de oportunidades tanto desde o punto de vista lexislativo como da realidade socioempresarial. Tecnoloxías e calidade de vida A sociedade evoluciona continuamente. As necesidades dos individuos transfórmanse ao mesmo tempo e as tecnoloxías constitúen un elemento esencial para satisfacer estas novas demandas. A utilización das tecnoloxías favorece o desenvolvemento da persoa, facilita a súa integración no contorno no que se desenvolve e ofrece novas oportunidades, tanto persoais como profesionais, que doutro xeito serían inimaxinables. Porén, son moitas as barreiras que limitan a accesibilidade e impiden un uso xeneralizado destas ferramentas. Responsabilidade social corporativa A empresa é unha das organizacións máis activas do tecido social. Como beneficiaria dun innumerable conxunto de servizos que este lle achega, non pode permanecer allea ás necesidades que presenta o seu contorno e debe participar activamente na mellora do benestar social. Baseándose en experiencias prácticas, os expertos reflexionarán neste congreso sobre os servizos que a empresa recibe da sociedade e que favorecen a súa competitividade, así como sobre as achegas que esta, pola súa banda, debe realizar, de maneira que se estableza unha relación na que todos gañen, «win-win». Pero, ademais, ante a crecente sensibilidade dos consumidores cara a estes temas, moitas empresas ven unha oportunidade estratéxica para diferenciarse e afastarse dos seus competidores. Retención do talento O talento, entendido nun sentido amplo como creatividade, compromiso e cualificación dos profesionais, é un dos maiores activos cos que contan as organizacións e un recurso escaso. En realidade, os recursos humanos son o que diferencia unha empresa doutra. A escaseza de talento tenderá a agravarse nos próximos anos. Todo isto formula un reto tanto para o sector público como para o privado: en ambos os dous ámbitos, as organizacións deberán ser capaces de xestionar con intelixencia e creatividade todo o ciclo de vida do empregado se queren atraer e reter os mellores. Precisamente, unha das ferramentas das que dispoñen estas organizacións é ofrecer políticas máis conciliadoras entre a vida persoal e a vida laboral dos seus empregados. Pola súa banda, os profesionais asumen implicitamente a responsabilidade de cumprir as súas obrigas con eficacia e compromiso. A retención do talento xa é unha das principais preocupacións do primeiro executivo das compañías e un dos primeiros retos dos directores de recursos humanos. Dependencia, conciliación e novos modelos familiares A dependencia constitúe unha realidade cada vez máis evidente do noso contorno. A incorporación da muller ao traballo, o aumento da esperanza de vida, o envellecemento da poboación, etc., fan que a dependencia adquira unha grande importancia na nosa sociedade. A preocupación do traballador polas persoas ao seu cargo que precisan coidados especiais provoca estrés, perda de atención no desempeño do seu traballo e, polo tanto, unha diminución da súa produtividade. Tamén se abordará no Congreso o tema da discapacidade e a súa integración no contorno empresarial e social. Tanto as empresas como o resto das organizacións que conforman a nosa realidade social deben ser conscientes de que un tratamento axeitado destes temas, en todas as súas vertentes, tamén é responsabilidade súa e constitúe un dos piares fundamentais do benestar social e da competitividade. No congreso analizaranse diferentes políticas gobernamentais levadas a cabo en distintas rexións e países, así como a avaliación dos seus resultados. Tendencias Neste módulo exporanse as principais perspectivas en materia de conciliación, igualdade, diversidade, dependencia e competitividade empresarial. Os expertos exporán as súas experiencias, reflexións e perspectivas de futuro sobre estas variables. Políticas gobernamentais locais, nacionais e internacionais As políticas dos gobernos, desde o nivel local ata o internacional, exercen unha función tractora para a consecución do benestar das persoas ás que representan. Son conscientes de que foron elixidos para xestionar eficientemente os recursos da sociedade. O obxectivo das súas actuacións está marcado por satisfacer as necesidades dos individuos e dos demais grupos que compoñen o tecido social. Neste apartado, os organismos públicos locais, autonómicos, nacionais e internacionais exporán as iniciativas e políticas que están a desenvolver en cada unha das áreas temáticas do congreso. Estes temas analizaríanse sempre tendo en conta o seu impacto, tanto na evolución da sociedade como na competitividade empresarial.