As empresas poderán solicitar ser recoñecidas polo seu labor social

As empresas poderán solicitar voluntariamente ser recoñecidas como empresas socialmente responsables, segundo se recolle no anteproxecto de Lei de Economía Sustentable e tal como explica Juan José Barrera, director xeral da Economía Social, do Traballo Autónomo e da RSE do Ministerio de Traballo e Inmigración. Deste xeito, todas aquelas entidades que acaden un nivel mínimo dos indicadores previstos en materia de RSC poderán solicitar este recoñecemento.

Estes indicadores estableceraos o Consello Estatal de Responsabilidade Social das Empresas e basearanse fundamentalmente na transparencia, o bo goberno, o compromiso social co ámbito local e co medio ambiente, o respecto polos dereitos humanos, as relacións laborais, a igualdade efectiva e a igualdade de oportunidades. Isto, sen dúbida, axudará a promover a RSC. Ademais, o propio anteproxecto recolle a intención do Goberno de incentivar que as empresas se autoavalíen nesta materia, a través dos indicadores mencionados anteriormente.