Os contratos laborais de persoas con discapacidade ascenden ata os 20.120 no primeiro cuadrimestre de 2011, un oito por cento máis que no mesmo período do ano anterior, segundo informou a ministra de Sanidade, Política Social e Igualdade, Leire Pajín, durante a reunión do Consello do Real Padroado sobre Discapacidade, presidido pola raíña Sofía.
"A Estratexia global de acción para o emprego das persoas con discapacidade deu e segue dando os seus froitos: en 2010 realizáronse 60.000 novos contratos, un 20 por cento máis que o ano anterior, unha tendencia que se confirma no primeiro cuadrimestre de 2011 con 20.120 contratos a persoas con discapacidade, un aumento do 8,1 por cento respecto do mesmo período anterior", declarou a ministra.
En materia de emprego, tamén destacou outras iniciativas do Goberno, como destinar o sete por cento das prazas da oferta pública de emprego a persoas con discapacidade, reservando o dous por cento a persoas con discapacidade intelectual, ou o Real decreto de medidas urxentes para a mellora do emprego e a reforma das políticas activas de emprego, entre outras.
Pajín destacou iniciativas como o Real decreto do voto accesible, aprobado o pasado mes de marzo, a Estratexia integral Cultura para Todos ou a aprobación do proxecto de Lei integral para a igualdade de trato e a non discriminación.
