As persoas con discapacidade auditiva terán a oportunidade de superar as barreiras de comunicación coas que se atopan á hora de adquirir un produto ou solicitar un servizo. E iso será posible cando entren nunha tenda da operadora de telecomunicacións Orange.
A compañía introduciu unha tecnoloxía nas súas tendas mediante un sistema de escoita baseado en bucles magnéticos, que mellora a accesibilidade e facilita a interacción dos seus empregados con calquera cliente que teña unha discapacidade deste tipo. Jesús Guijarro, director de RSC de Orange, explica que o proxecto xorde «como resposta á necesidade de eliminar aquelas barreiras que non nos permiten atender as persoas con discapacidade auditiva en igualdade de condicións que as demais».
O sistema, polo momento, só se está a desenvolver nos puntos de venda que Orange ten en España. E, en concreto, nas tendas que a operadora considera emblemáticas, recentemente inauguradas, como as da Porta do Sol e da Gran Vía en Madrid. «A instalación dos bucles magnéticos incorporarase a todas as novas aperturas que se leven a cabo a partir de agora e a nosa intención é levar a iniciativa a toda a canle de distribución de Orange», engade Guijarro.
En canto ao posible número de persoas beneficiadas, o directivo inclúe todas as persoas clientes con esta necesidade que pasen polas tendas. «Para dar un dato que ilustre a súa importancia, actualmente en España hai máis dun millón de persoas con próteses auditivas».
Os bucles magnéticos transmiten o sinal directamente ao audiófono, reducindo os ruídos de fondo, a reverberación e outras distorsións acústicas. As dúas tendas de Madrid onde se incorporou este sistema de audio contan, así mesmo, con diferentes ambientes. Preguntado polo investimento, Guijarro explica que «non adoitamos dar este tipo de cifras. Abonda dicir que para nós non é tan significativo o esforzo económico como o beneficio que proporciona aos nosos clientes».
Colaboracións
Esta iniciativa, incorporada ao plan de responsabilidade social corporativa (RSC) da operadora para o ano 2015, contou coa colaboración da Confederación Española de Familias de Persoas Xordas (Fiapas). Ademais, coincide cunha recente petición da Fundación ONCE ás operadoras para que desenvolvan aplicacións para móbiles e terminais accesibles destinadas ás persoas con discapacidade, realizada durante a presentación do Libro branco para o deseño de tecnoloxía móbil accesible e fácil de usar.
A Fundación para a Diversidade traballa e colabora con Orange en diferentes asuntos relacionados coa diversidade: Sesión do Ciclo de Foros 2011-2012
