En 2009, ano de creación da Fundación para a Diversidade e de celebración do primeiro acto de sinatura do Charter para a Diversidade, 30 empresas asinaron a carta de compromiso, mentres que hoxe, 6 anos máis tarde, son case 700 as empresas asinantes comprometidas cos seus principios.
A Fundación para a Diversidade posicionouse entre as primeiras organizacións sen ánimo de lucro que traballan a prol da integración e da diversidade. Desde a súa creación en 2009, o número de empresas e organizacións que se adheriron ao compromiso do Charter pasou de 30, nun primeiro acto de sinatura, a case 700 no último, celebrado o pasado decembro en Barcelona.
Un ano despois da primeira sinatura, en 2010, xa eran 375 as entidades que se sumaran a este compromiso, o que demostra a importante repercusión que tivo entre as diferentes empresas e organizacións desde que se iniciou en España, en 2009.
Coa próxima sinatura, que se celebrará nos vindeiros meses, suman un total de 20 os actos que se celebraron, constatando o maior impulso de contornos de traballo nos que se respecten os principios de igualdade e non discriminación.
Esta iniciativa do Charter para a Diversidade está impulsada, en España, pola Fundación para a Diversidade, entidade constituída polo Instituto Europeo para a Xestión da Diversidade e a Fundación Alares e que pertence á Plataforma de Charteres Europeos.
A Comisión Europea, por medio da Dirección de Xustiza, no desenvolvemento das súas políticas de loita contra a discriminación, impulsou a creación dos Charteres da Diversidade, para mellorar a eficacia empresarial e a sustentabilidade social, no marco do respecto á lexislación interna vixente en materia de igualdade e non discriminación.
Xa hai 16 Charteres da Diversidade na Unión Europea e varios están en proceso de constitución. A Plataforma aspira a instaurar un charter en cada un dos Estados membros. En total, a suma das empresas asinantes de España e do resto de empresas asinantes dos Charteres Europeos alcanza xa case 3.500 organizacións.
O charter da Diversidade
O charter, máis alá de ser unha carta ou un código, é un compromiso que busca fomentar unha comunidade que comparte os mesmos principios a prol da integración plena de toda a sociedade.
É un compromiso de comportamento e de respecto ao dereito á inclusión de todas as persoas, independentemente dos seus diversos perfís, no contorno laboral e na sociedade. O seu carácter é voluntario, gratuíto e ten unha validez de dous anos, despois dos cales pode renovarse sucesivamente. Está baseado no compromiso empresarial, tendo como punto de partida a visibilización da importancia do papel da empresa na aplicación práctica de cada un dos principios do Charter.
