A representación das mulleres nos consellos de administración das grandes empresas segue a ser escasa, aínda que aumentou en 2011, cando se situou no 13,8 % a escala mundial, debido principalmente aos sistemas de cotas aplicados en varios países europeos.
O estudo, que se realiza cada dous anos, foi presentado hoxe nunha das sedes do Banco Mundial en Washington pola Corporación Internacional de Mulleres Directivas (CWDI, en inglés), unha organización de mulleres empresarias dedicada a promover a igualdade de xénero nas grandes corporacións.
Francia e España lideran o aumento de representatividade desde 2004, cando se comezou a medir a presenza feminina nos principais consellos de administración internacionais, cun incremento do 13,9 % e do 7,3 % nos últimos sete anos, respectivamente.
Ana María Llopis, conselleira de Société Générale e presidenta do grupo DIA, defendeu, nunha conversa con Efe, a presenza feminina nos cadros directivos das empresas, porque «nun momento de crise a muller achega un talento especial na toma de decisións, na asunción de riscos, nos asuntos de ética e nos recursos humanos».
«O tema das cotas é interesantísimo: cando se establecen cotas temporalmente, o proceso acelérase. Cando a velocidade do movemento non é suficiente, hai que aceleralo», engadiu tras a presentación do informe.
A escala mundial, os EUA encabezan a lista de porcentaxe de mulleres nos consellos de administración, cun 20,8 %, seguidos de Francia, co 20,1 %, do Reino Unido, co 16,8 %, e de Alemaña, co 15,4 %.
España, que en 2004 apenas contaba cun 1,9 %, rexistra en 2011 un 9,2 %, grazas en boa medida ao sistema de cotas esixido polas autoridades españolas en 2007.
De acordo co informe, que estuda a situación na lista das 200 principais empresas mundiais publicada pola revista «Fortune», este sistema de cotas produce «a longo prazo un conxunto de directoras con experiencia, de modo que a diversidade de xénero deixa de ser un problema».
China e Brasil, dúas das grandes economías emerxentes, tamén rexistran unha crecente representación feminina nas grandes empresas, cun 8 % no caso do xigante asiático e un 8,3 % no latinoamericano.
Para máis información prema aquí
