Onte comezou a IV Conferencia ministerial europea sobre Integración en Zaragoza, un encontro no que participaron representantes políticos dos 27 membros da Unión Europea. Durante a reunión de onte, todos os países presentes acordaron pedirlle á Comisión Europea que poña en marcha un programa piloto cunha serie de indicadores para medir o nivel de integración das persoas inmigrantes no ámbito comunitario.
Ademais, os 27 insistiron na urxencia de activar a axenda de integración cun obxectivo que se deberá cumprir en cinco anos e que concrete as medidas e os acordos alcanzados no marco desta conferencia que se está a celebrar en Zaragoza.
Aínda que estes indicadores de medición da integración non están determinados, previsiblemente abranguerán a empregabilidade do colectivo inmigrante e o seu nivel de escolarización, o grao de coñecemento do idioma autóctono ou o seu nivel de participación na vida pública e cidadá.
Nese caso, a declaración recollerá o compromiso dos Estados asinantes coa diversidade e a súa intención de establecer itinerarios de integración comúns para toda a Unión Europea co obxecto de ofrecer mellores oportunidades laborais ás persoas inmigrantes e implicar as empresas na non discriminación destas persoas.
