UNIR Cuidadores, a empresa de formación e asistencia aos coidadores familiares e profesionais de persoas maiores, con discapacidade e/ou dependentes, impulsada pola UNIR, Universidade Internacional da Rioxa, e Alares, líder española en asistencia privada ás persoas nos seus fogares ou lugares de traballo, en toda a xeografía nacional e portuguesa, con máis de 15 anos de experiencia, asinan un convenio de colaboración.
O obxectivo principal do acordo é proporcionar unha formación ampla e de calidade a toda a comunidade de coidadores a domicilio no ámbito sociosanitario, aos empregados e empregadas do fogar no noso país e ás familias que teñen no seu contorno persoas dependentes ou que precisan coidados. Poñerase á disposición de Alares toda a oferta formativa actual de UNIR Cuidadores e á disposición de UNIR toda a experiencia acumulada de Alares. Así, desenvolveranse novas temáticas que sexan necesarias para satisfacer as necesidades formativas de todos os colectivos mencionados e, entre ambas as entidades, impulsarase a formación e profesionalización do sector.
O catálogo actual, que inclúe unha ampla oferta formativa, está dispoñible tanto desde a páxina web de UNIR Cuidadores como desde a de Alares, e recolle máis de 90 temáticas, con clases en liña, cursos e certificados de profesionalidade do sector sociosanitario e do servizo doméstico. Ademais, pódese dispoñer de formación desde 1 hora ata 600, número de horas necesario para a obtención dos certificados de profesionalidade no ámbito sociosanitario.
Utilízase a metodoloxía de formación en liña de UNIR, a Universidade en Internet, onde practicamente o 100 % do alumnado que comeza un curso o remata e o 98 % o recomenda.
A plataforma de formación é sinxela e intuitiva, e permite ao alumnado interactuar cos compañeiros e profesionais a través do foro e do chat dos cursos. Ademais, tanto os cursos como as clases inclúen a figura do titor, que acompaña o alumno durante todo o seu período de aprendizaxe, resolve as súas dúbidas e fomenta a súa motivación. Deste xeito, consegue aprender dos mellores profesionais, aforrando tempo e diñeiro en desprazamentos, sen importar o lugar de residencia, e facéndoo accesible a todas as persoas que simplemente dispoñan de conexión a Internet.
Ademais, o convenio asinado recolle aspectos tanto para mellorar o posicionamento e a imaxe do sector como para conseguir unha maior empregabilidade das persoas que queiran traballar nos servizos de atención e coidados das persoas maiores e dependentes.
Aurelio López-Barajas, conselleiro delegado de UNIR Cuidadores, declara que "poñer á disposición de toda a comunidade de coidadores a experiencia de Alares e a de UNIR, co seu amplo catálogo e metodoloxía formativa, permitirá profesionalizar a figura do coidador e do persoal de servizo doméstico, logrando a súa empregabilidade e a mellora da calidade de vida das persoas ás que coidan".
Javier Benavente Barrón, presidente de Alares e da Fundación Alares, afirma que "a formación é fundamental para poder prestar un servizo exquisito e da máxima calidade ás persoas nos seus fogares. Polo tanto, investir en formación é clave tanto para as persoas que vocacionalmente desexan traballar neste sector, como para aquelas que xa o están facendo e necesitan reciclarse, ou para as empresas que desenvolven a súa actividade no sector e teñen interese en permanecer nel.
O éxito de Alares e do "Método Alares" de asistencia individual personalizada baseouse sempre na "escoita" permanente das novas necesidades, no desenvolvemento de novos servizos e na súa accesibilidade ao maior número posible de persoas, na calidade das prestacións como eixo fundamental, na innovación permanente e, moi especialmente, na formación continua dos seus colaboradores".
