2009an, Aniztasunaren aldeko Fundazioa sortu eta Aniztasunerako Gutuna sinatzeko lehen ekitaldia egin zen urtean, 30 enpresak sinatu zuten konpromiso-gutuna; gaur egun, 6 urte geroago, berriz, ia 700 enpresa sinatzailek dihardute haren printzipioekin konprometituta.
Aniztasunaren aldeko Fundazioa integrazioaren eta aniztasunaren alde lan egiten duten irabazi-asmorik gabeko lehen erakundeen artean kokatu da. 2009an sortu zenetik, Gutunaren konpromisoarekin bat egin duten enpresa eta erakundeen kopurua 30etik —lehen sinatze-ekitaldian— ia 700era igaro da; azken ekitaldia joan den abenduan egin zen Bartzelonan.
Lehen sinaduratik urtebetera, 2010ean, 375 erakundek bat egin zuten jada konpromiso horrekin; horrek erakusten du Espainian 2009an abian jarri zenetik enpresa eta erakundeek konpromiso horri emandako garrantzia.
Datozen hilabeteetan egingo den hurrengo sinadurarekin, guztira 20 ekitaldi eginak izango dira; horrek berdintasunaren eta diskriminaziorik ezaren printzipioak errespetatuko dituzten lan-inguruneei emandako bultzada handia berresten du.
Aniztasunerako Gutunaren ekimen hau, Espainian, Aniztasunaren aldeko Fundazioak bultzatzen du; erakunde hori Aniztasunaren Kudeaketarako Europako Institutuak eta Alares Fundazioak eratu zuten, eta Europako Gutunen Plataformaren parte da.
Europako Batzordeak, Justizia Zuzendaritzaren bidez eta diskriminazioaren aurkako politikak garatuz, Aniztasunerako Gutunak sortzea bultzatu du, enpresen eraginkortasuna eta gizarte-jasangarritasuna hobetzeko, berdintasunaren eta diskriminaziorik ezaren arloan indarrean dagoen barne-legeria errespetatzearen esparruan.
Europako Batasunean dagoeneko Aniztasunerako 16 Gutun daude, eta beste hainbat eratzeko prozesuan daude. Plataformak estatu kide bakoitzean gutun bat ezartzea du helburu. Guztira, Espainiako enpresa sinatzaileen eta Europako gainerako Gutunetako enpresa sinatzaileen baturak ia 3.500 erakunde hartzen ditu.
Aniztasunerako Gutuna
Gutuna, gutun edo kode bat izatetik harago, gizarte osoaren erabateko integrazioaren alde printzipio berberak partekatzen dituen komunitatea sustatzea helburu duen konpromisoa da.
Jokabide-konpromiso bat da, pertsona guztiek, beren profilak edozein direla ere, lan-ingurunean eta gizartean txertatzeko duten eskubidea errespetatzekoa. Borondatezkoa eta doakoa da, eta bi urteko balioa du; epe hori igarotakoan, behin eta berriz berritu daiteke. Enpresa-konpromisoan oinarritzen da, eta abiapuntutzat hartzen du enpresak Gutunaren printzipio bakoitza praktikan jartzeko duen eginkizunaren garrantzia agerian jartzea.
